Giocatore – Centravanti
Nato a San Giorgio di Piano (BO) il 30-8-1904
Esordio in campionato: 24-10-1920, Spal-Bologna 0-3
Zäntratâc d una dêrma straurdinèria e d una sfurtóṅna da fèr i cinén, as fé lèrg fén da cínno int al Bulåggna par vî d un néṡ eceziunèl pr al gòll, prémma ed farmères pr un inzidänt al żnòc’. L êra al cóllmin dla sô carîra, bèle in åurden par la Nazionèl, quand as fé mèl, ai 12 ed nuvàmmber dal ’22 int la partîda vénta con la Crémunaiṡ 3-0. Al scrivêva al dé dåpp la Gazatta dal Spòrrt: «Int al prémm tänp Alberti l à avó d’andèr fòra dal canp pr un chèlz ciapè int un żnòc’: l é turnè dänter dåpp a 12 minûd mo apanna ai é tachè al secånnd tänp ai é tuchè d abandunèr la partîda dal tótt». Al parêva un infurtónni da pôc e Albêrti al turné a żughèr dåpp un maiṡ, ai 10 ed dṡàmmber a Turtåṅna, mo l avé da arnunzièr e la diâgnoṡi la fó terébbil: menéssc stianchè, che a chi ténp là an s psêva brîṡa operèr. E dånca fén dl’ativitè e at dégg adío al’anbiziån ed żughèr in Nazionèl. Al Bulåggna al i dé la léssta gratóita e d ló par pió d un ân an s sinté pió dscårrer. Al s êra trasferé a Gênova e dal ’24, un dutåur ed là, al profésåur Federico Drago dal Ṡbdèl San Martén, al i fé la prupòsta d un’operaziån par cavèri al menéssc, che alåura in Itâglia inción s êra gnanc atintè a fèr, e invêzi in Inghiltèra i l’avêven bèle sperimentè d cäl pôchi vôlt, con bôna riusé, anc såura di atlêta famûṡ. L’operaziån l’andé bän e al Gênoa al fé una prupòsta a Albêrti: la Gazatta dal Spòrrt la dé acsé la nutézzia dal sô artåuren: «L esperimänt pió interesànt, e brîṡa såul dal lè dal spòrrt, al srà al recópper d Albêrti, al brèv centre-forward (zäntratâc, ndr) dal Bulåggna. As sà che st żugadåur furtéssum al manca da pió d un ân dai canp da fóttbal pr una bòta int un żnòc’. In Inghiltèra da un problêma ed cal gêner qué i véṅnen fòra cavànd una catilâgin e ògni ân i n én bṡa pûc i żugadûr ed nómm ch’i van såtta a sta operaziån che quèṡi sänper la i fa turnèr cme prémma dl’inzidänt. E vésst che l’operaziån d Alberti, fâta da un bravéssum chirûrg genuvaiṡ, benemêrit anc stra i spurtîv, l’é andè pr al méi dal lè chirûrgic, a psän sperèr che un chèṡ acsé al dvintarà un quèl normèl e che al fóttbal itagliàn al pòsa avair un valuråuṡ żugadåur in pió». E acsé ai 19 d utàbber dal ’24, ala têrza ed canpiunèt, Albêrti l êra in canp un’ètra vôlta, in Gênoa-Hellas 2-0. In cla staṡån lé al żughé 20 partîd e al fé 10 gòll e par żónta l avé al primèt anc in sta curiuṡitè qué: al fó pròpi ló ch’al fé al prémm gòll int la prémma partîda dal famåuṡi zénc finèl, e a spianèr la lażż dl èccs, ch’al srêv pò a dîr la tradiziån d un èccs-żugadåur ch’al fa gòll quand l é cåntr ala sô vècia scuèdra. A prupòṡit Enrico Sabattini int äl såu memòri da tstimòni di fât al scrivêva: «Ala fén dla partîda ai fó un pô d ṡgunbéi parché socuànt bulgnîṡ scalmanè i miténn sô un pandemòni con di numâz ed traditåur, cåntr a Mímmo (ch’l êra al scutmâi d Albêrti, ndr), puvràtt, ch’l avêva l’ónnica cåulpa d avair fât al sô amstîr ed żugadåur. Mo cla sîra stassa, pr åurden d Arpinèti, pròpi int la vècia traturî d famajja d Alberti, int i Uṡbêrti, i żugadûr ptrugnàn i s incuntrénn col sô vèc’ cunpâgn par fèr la pèṡ una vôlta par tótti e par fèri vàdder tótta la stémma e l’amizézzia ch’la n êra brîṡa finé».
Mo purtòp una brótta dṡgrâzia l’êra drî a arivèr dåpp gnanc un ân, pr al canpiån recuperè: a quâtr åur dla matéṅna dal dé di 14 ed mèrz dal 1926, con bèle 8 gòll fât in 11 partîd, al murêva a 21 ân apanna pr un’intusicaziån alimentèr. I génn ch’äl i êren stè däl còz andè da mèl anc se la fazannda la n fó mâi méssa in cèr dal tótt, al pónt che ai fó anc ed quî ch’i dscurénn d una vendatta par geluṡî d una sô vècia anbråuṡa.
| Presenze rossoblu in Campionato | 45 | Reti | 32 | |
|---|---|---|---|---|
| In Italia | ||||
| 1920-21 | Prima Categoria | 17 | 13 | |
| 1921-22 | Prima Categoria | 22 | 14 | |
| 1922-23 | Prima Categoria | 6 | 5 | |
Per approfondire:
Video: le immagini della quinta partita dello spareggio del primo scudetto, Bfc-Genoa 2-0, 9-8-1925
Video: Genovesi racconta lo spareggio con il Genoa del primo scudetto, 1925
Video: Sabattini racconta lo spareggio con il Genoa del primo scudetto, 1925